صفحة الشاعر

saad_poetry@hotmail.com

للاطلاع على ترتيب الشاعر ضمن سباق الأدباء وتسجيل رأيك

  تستلذ بطعنتي

تستلـذ بطعنـتـي ..واجامـلـك
                                وتستثير الضيق ..بالصدر الوسيع!
مـا يريّحـنـي اذا .. بعامـلـك
                                مثل ما سويـت بالحـب الرضيـع
السعادة لـو تجـي .. بمصاملـك
                                    تستطيع اتجيـب مـالا تستطيـع!
الحزن رهن اصبعـك ..واناملـك
                                    تستـدل الهـم والجـرم الشنيـع
لى متى بيـن الحنايـا .. حاملـك
                                عن دروب الناس خوفن لاتضيـع
وانت ثامل طيش تجهل .. ثاملـك
                                  لاتحـس ولا تـروق ولا تطـيـع
الولي يمهـل ولاهـو .. هاملـك
                                لا تميت الشوق في عـز الربيـع!
شدّ وان شدّت معـك .. زواملـك
                               في مراح الحـب تلقانـي صريـع

تووه يزيين الشعر

الله رزقني ضمـن الانعـام خـوه
                                خوة رجـال مدسميّـن الشـوارب
اقلهـم .. بالطيـب كلـه مــروه
                                    مـروة ٍ ماهيـب حقـة مــأرب
لا قلت سوّ الشي من غيـر سـوه
                                كنه على ما قلـت للشـي هـارب
ماهو بمن لا قلت: لـوه .. ولـوه
                                ياطى على خشم الشقى بالتجـارب
قوه على قوتك ..لا قلـت قـوووه
                                  في عين منهو لا طرالـه يحـارب
تحشم مزايـا فزعتـه كـل فـوه
                                     وتحشم محيا طلتـه كـل غـارب
اصغرهم.. اللي بالسوالـف مفـوه
                                واكبرهم ..اللي منبع الطيب شارب
وابخلهم ..اللي ما طفت يوم ضوه
                                واقساهم ..اللي يحتمـي للاقـارب
وارداهم ..اللي ما بدا منـه سـوه
                            وادناهم ..اللي ما مشى درب خارب
واضيقهم ..اللي ما خرب يوم جوه
                            واضعفهم ..اللي ما يهاب المضارب
واغباهم ..اللـي بالذكييـن مـوه
                            واغمضهم.. اللي بالاشارات عارب
وافقرهم ..اللي ما على الفقر ااوه
                              وارخاهم.. اللي لا تراخيت كـارب
توه .. يزيين الشعر والشعر.. توه
                            ياخذ ..مصفّه في مصفّ القـوارب
في مدح منهم لظهر الطيـب نـوه
                            نبدي على ذكر الشوارب شـوارب

القلادة

في ليلة الجمعه ولا ادري على وين ؟
                                    بـس الاكيـد انـه ذبحنـي غلاهـا
اسمع صدى صوتي واحسك تناديـن
                                    واقـول يالله يـا رحيـم.. اتهداهـا
تدرين في شوقي ولو كـان تدريـن!
                                      النفـس تجهـد بالوفـا مبتغـاهـا
ماهو مجرد حـب يعنـي تحبيـن !!
                                 ولاهو مجـرد شـوق والا عساهـا
يمكن احس اكثر من انـك تحسيـن
                                لو ما وصلـت أشيـا تعـذر مداهـا
ويمكن اجي لك كيف منتـي توديـن
                                 واعن رجلـي واثـق ٍ فـي خطاهـا
ياهي قوووية كان شفتـك تروحيـن
                                وانا اتبعك وامشي كـذا فـي عماهـا
هذا مكانك يـوم كنتـي .. تقوليـن:
                                  ان الحـلا بالبنـت شوفـك حلاهـا
وهذا مكانـك يـوم كنتي..تشوفيـن
                                    ان القصايـد افرطـت فـي دفاهـا
وهذا مكانك يـوم كنتـي.. تظنيـن!
                                   اني هذيـك البنـت ماشـي وراهـا
وهذا مكانك يـوم كنتـي.. تصليـن
                                 ولو تسألين الارض تبكـي سماهـا
واللحين روحي سامـح الله ثنتيـن
                                روحي وروحك يـوم دقـت رحاهـا
وابسألك بالله من حيـن لـى حيـن
                                  تمسكي بحاجه .. وحاجـه معاهـا !
دامك لبستي هالقـلاده مـن سنيـن
                                  تذكّـري !! منهـو لعينـك شراهـا

عواقيب الشجاعة

عـلـى اطـلال الـوفــا وقّـفــت سـاعــه
                            واقـول ان الـجـفــا مـالــه شـفـاعــه
اتـمـتـمـهـا بـصـدري لـيــن صــدري
                          حـمـسّ قـلـبـي عـلـى نـار الـقـطـاعـه
ولا عــاد الـمـشـاعــر هـــيّ هــيّــه
                            ابـشـهــق والـهــوا يـزفــر وداعـــه
مـــدام ان الــقــدر اصـــدر قـــراره
                                انــا لـلــه تـقـبّــلــت بـقـنــاعــه
ابـحـرق صـورتــه وارمــي سـنـيـنــه
                          واجــدّف طــاوي ٍ فـيـنــي شــراعــه
إذا الـدنـيــا تـورثـنــا الـمـتــاعــب
                        واحـاسـيـسـي لـهـا نـقـص الـمـنـاعـه
تـأثـربــي عـلــى كـثــر الـمـواقــف
                         وفـقـيـر الـحـال مـا تـغـنـي طـبـاعــه
تـلــون حـالـهــا عــكــر مــزاجــي
                        وتـبـاطـى مـن مـشـى يـحـمـل مـتـاعـه
ضـجـر مـوج الـبـحـر يـصـفـع مـوانـي
                         ويـضـيـق الـكـون فـسـق ٍ بـتّـسـاعــه
سـبــب مـنـهــو تـغـشـانــي ســواده
                            لا بـيّـض نـيّـتــه بـبـيــض قـنـاعــه
بـعـد مـا أهـدرت روحـي لـجــل روحــه
                             تـشـبــع والالــم يـشـبــع جـيـاعــه
لـبـس ثـوب الـزمـن وارهــا طـعـونــه
                    وزرع غــدره عـلــى ظـهــري زراعــه
الـيـن الـيــوم يـتـعـبـنــي وقـوفــي
                        امــام الـحــب وارهـقـنــي سـمـاعــه
اود انـســى ولــو اقـســى بـحــالــي
                       ذوت نـفـسـي مــع نـفـســي صـراعــه
عـلــى حــد انـفـصامـاتــي تـأرجــح
                        ولا اسـتــأت كـثــر بـطـشــي ذراعــه
نـقـص فـي عـيــن هــداج الـمـحـبــه
                          ويـحـســب ان الـزيــادة بـأرتـفـاعــه
كـبـر فـيـه الـكِـبـر حـتــى تـضـائــل
                         وتـواضــع بـالـغــلا حــدّ الـوضـاعــه
يـشـجـعـنـي مـمـارســة الـخـيـانــة
                           واجـرب مـتـعـتـه وانـهــج ضـيـاعــه
جـهـل بـضــرار عـاقـبــة الـتـخـلــي
                            وحـرقـة عـاشــق ٍ جــرّ الـلـتـيـاعــه
يـقــول ان الـشـجـاعــه بـالــمــوادع
                            وهـو يـجـهـل عـواقـيـب الـشـجـاعــه

تكفى عشاني

يمكن تحس اني مـع البعـد ناسيـك
                              لكن تأكـد .. مـا نسيتـك ثوانـي
لا مر طيفك قمت اهوجس واحاكيك
                            واشكي لى طيفك كثر ماهو شكانـي
واتذكر اشيائـك .. واردد اغانيـك
                           وابكي اذا حسيـت حظـي رمانـي
واحمّل النسمـات طيـف ٍ يناجيـك
                            واطلق مع ذكرااااك صهوة عنانـي
واحسّ تتسأل عـن احـوال مغليـك
                            واجاوبك ..تذكر مكانـي! مكانـي!!
وتقول: لي وشفيك؟ واقول: وشفيك !
                            وشلون ما تبغـى بعدهـا اعااانـي!
وتقول: لي طيفـي تركتـه يداريـك
                            واقـول: طيفـك للمهالـك حدانـي
وتقول: لي تبكي! وانا اللي موصيك
                             واقول: لك تبغـى ازف ّ التهانـي!!
صرت اتجرع مرّ من دون حاليـك
                           واكتب على الفرقا قصيـد واغانـي
لا جيت ابكتب مدح لازم اطريـك!
                           ولا جيت ابكتب حب مالحب هانـي
صرت اكتب الفرقا بفحـوة معانيـك
                            واطلع مع فرقاي بأصـدق معانـي!
واسامر النجمة وانا اقـول : لبيـك
                        اسمع وحيـك.. ولا اكـذب اذانـي
وانته بعيد ٍ مـا وصلنـا اراضيـك
                        الا انك اقرب من صفوف المحانـي
ولاجابو اسمك جيت كني معاديـك!
                        عشان مسمع قـول خلّـي نسانـي !
والا انت وافي والوفـا مـا يخليـك
                        والطيب بصلك ما خفـاك وخفانـي
لذا .. تصبّر والصبر فـي معاليـك
                        يهون .. يوم ٍ قلت : تكفى عشانـي!

 اعمى !!

رغم الظلام اللـي يطـوّق عيونـي
                            ما كنت اخاف اطيح وان طحت باقوم
احيان احسّ ان البشـر يحسدونـي
                               واحيان احسّ انهم يقولون محروم!
احيان اجرّح من دموعـي جفونـي
                            واحيان احسّ اني من الدمع معصوم
ولو تمتمـوا حسيتهـم يقصدونـي
                            وان جاهرو كنّي من الناس مرجـوم
في داخلي حلـم المـلا يبصرونـي
                           اتعب ولاني بالتعب يـوم مرغـوم
اشتاق اشوف الناس والناس دوني
                         وانا البعيد اللي مع النـاس ملمـوم
في غربتي .. حلمي تثاقـل متونـي
                          في غربتي.. محدن اقاسمه الاهموم
في غربتي لو مالبشـر يوصفونـي
                        توقّض الحيرة حياتـي مـن النـوم
في غربتي ما اقول كلهـم نسونـي
                        لكن قليل اللـي طرونـي لهاليـوم
ولا غرّد العصفور نبـرة شجونـي
                         والارض تنطق لا تعثرت محشـوم
اتلمّس اشيائي احـسّ افقدونـي

                        واعطف على الحايط ولو كان مهدوم
من غيرهم لامن حكيـت اسمعونـي
                         من غيرهم في ظلمت الوقت معزوم
والا البشر مـا عمرهـم بشرونـي
                          قوم ن تخالف وجهة الدين والقـوم
حتى السلام احيان يخلـف ظنونـي
                        لاجيت اسلّـم كنّـي اقـول مغمـوم
اعمى.. وابي كل البشـر يتبعونـي
                        ولاحدن على غيره من الناس ملزوم
امشي كذا .. لوكانهم يفهمونـي
                        ما قالوا اني غير واثـق وزيـزوم
اتعمد الطيحه ..واقـول امسكونـي
                        عشان اقول:الحمد والشكر لـه دوم

 الحزن والابتسامة !!
 

تدري وش اللي حيّر الناس امره
                            والناس تتسال خفوقي علامـه ؟
اني اشيل بداخل القلـب جمـره
                        واعطي على كل الهموم ابتسامه !
الحزن يطلع لي مع كـل زمـره
                         والدمع مبطي بالعيون انسجامـه
هالقلب يتواكل مع الوقت عمـره
                          ولا يقلل ..من تعبه احترامـه !!
والحظ بعيوني له اعيون حمـره
                         وفوق القرون احيان يلبس عمامه
ما كان يسعفني على شق تمـره
                         وابعد علي من السما في سنامـه
ويومه تدلا ..مـا تـدلا بثمـره
                         كنه على مثلي يسـوق الفهامـه
لذا .. غمرت الهم والناس غمره
                        امـوت اسـد ولا اتنعّـم نعامـه

 شهرة جروحي

شفت الهموم اشلون صـارت قصايـد
                        ووشلون صفق لي من الهم جمهـور!
شهـرة جروحـي تنكتـب بالجرايـد
                      والناس تنطرني مـع الهـم بالـدور!
وانتـه .. ولا فكـرت حتـى تعايـد
                      واللي بصدري عيّـد العيـد مقهـور
صار السهر ل جفون عينـي وسايـد
                      وقص الكلام اللـي ابحكيـه بالـزور
صـدرت لكـن مـا جنيـت العوايـد
                     والشاهد الله ما انتظر منـك مشكـور
اصبحت ل حـزاب المجاريـح قايـد
                    وعلى همـوم الحـب استـاذ دكتـور
اقرضتـك الخفـاق بـدنـى فـوايـد
                    وحطيت لـك دون العمـلاء معـذور
وصار التغلـي سايـد ٍ وانـت سايـد
                   وكني رجعت اصف بالعشـق طابـور
اليـا وصلـت اتقـول خلـك محايـد
                  وتضمني ضمتـك واجيـك مجـرور!
شفتـك تزيـد الهـم والهـم زايــد
                 معن خوفي بـس.. لاجيـك بقصـور
وانتـه تـوردنـي دروب النكـايـد
               حتى الماسنجر حالتي فيـه محضـور!
وش حيلتي والقلـب سنتيـن جايـد
                وازرت عيوني تحضن الدمع بغـرور
ولا صف جيش الحرب ماهـو برايـد
                كنه على ادنـات مـا جبـت مجبـور
ولاشن حربه .. شنهـا عنـك ذايـد
                 وانته تكسّر خاطـر ٍ منـك مكسـور
مرات احس انـي مـع الوقـت نايـد
                ومرات كنـي فـي محبتـك ماسُـور
برض الرخا ما شفت غيـر الشدايـد
                وبرض الشقى لو يضحك الحب مدحور

 الجديد

الجديد اني معدت اكتـب جديـد
                    من قديمـي يـا نديمـي استجـد
لا حيـاة ولا معانـي ولا قصيـد
                     والبـلا غيـري ينادينـي سعـد
شاب همي وارتوا منـه الوريـد
                       وانتـزع كـل السعـادة للأبد
القصايد فـي فراقـه وش تفيـد
                     والأماني لا طريتـه مـا تسـد
انقطع يـوم انقطـع كـل البريـد
                     والحزن طفل ٍ يضيق ابه المهـد
والجروح جروح قربه من بعيـد
                    والضلوع اليوم حبل ٍ مـن مسـد
الأكيد اني بمـوت مـن الاكيـد
                    ومن طعون الوقت يـزداد العـدد
لو يصير القلب كتله مـن حديـد
                     لا صهره الحب ما يرجـع بعـد
الهوا ما شفت مثلـه مـن عنيـد
                    والبلا ما شفـت مثلـه مضطهـد
عشم العشـاق بالعيـش الرغيـد
                    لا حصدها ..ولا ترك غيره حصد

 الدموع المساجين

تبيني ازعـل لاعرفتـك تخونيـن
                       الله وامانـه ماتراخصـت دمعـي
اللي طغاه الزيـن غيـره مزاييـن
                        وانا بدوي ما عكّر الجرح طبعـي
ابقى جريح ن من عروض الملايين
                        ولا ضعيفن هش من دون ربعـي
ما طال عفوي هالدموع المساجين
                        ولاهيبت جمع السكاكيـن جمعـي
قلبي خضر والورد وسط البساتين
                        ولا جففت كـل البساتيـن نبعـي
مسكيـن.. لاوالله مانـي بمسكيـن
                       ولاني على ماقيل انسـان رجعـي
قمة برودي من بـرود البراكيـن
                        اتبع .. ولكن ماني بنسـان تبعـي
حكيم والحكمة تعشـق السلاطيـن
                       ولاسمع من اللي مايقديـه سمعـي
ببقى على وجهي ولااحط وجهيـن
                        ويوم اتعدا مـا تعديـت شرعـي
ولوعلمك درب الهوا كيف تنسيـن
                      بأخذ من خطوط الغلا خط فرعـي
بعيش وحدي دمك انتـي تخونيـن
                        ولاخون ذكرانا ولا اخون طبعـي
يحقلي افخر مـن الحيـن للحيـن
                        واشعل من شعور الوفا كل شمعي
الله خلق غيري وغيـرك محبيـن
                        والله يجازيني على طيب زرعـي
تكفين.. لاوالله مـا اقـول تكفيـن
                        ولا اخون للخاين ..وفيات دمعي!!

 خابرك تزعل

تدري شسوي كل ما حل طاريـك!!
                            والا بلااااااش اقول ..خابرك تزعل
واخاف تبكي كثر ما ابكيت مغليـك
                          واخاف اموووت ان قلت امر تدلـل!
اصلا خلااااص اليوم ما عاد يمديـك
                         والجرح من جملـة خطايـاك ينهـل
افنيت عمري بس من شان احاكيـك
                           وعجزت الاقي في مشاعرك مدخـل
غيّرت من طبعي على شان اراضيك
                          وانتـه ولا ودك اذا غبـت تـسـأل
اغيب لجل الشوق واشتاق واجيـك!
                          وانا قبل ساااااااعة معـاك اتعلـل!!
وش حيلتي والقلب نبضـه يناديـك
                         ولامن نبض بأسمك يا دوووب اتحمل
واليوم غيـر الامـس والله يخليـك
                         ما عاد بي طاقة ترا الصبـر طـوّل
ان كان ودك تاخـذ اليـوم طاريـك
                         بأموت موتة عزّ .. قبـل اتوسـل !

احترت

احترت كيف ابدي ومن وين ببدي= وعـشـان بـبـداهـا كـتـبـت الـنهـاية
ون كان بتصـديـن تكـفـيـن صـدي=ما ودي امـشـي وانتي بعدك ورايه
الدمـع ما يصـبـر على فراق خدي=وانا بـعـد ما اقـطع زيــارة شـقـايه
يـبخـل علي البحــر وأعطيه مـدي=يـشـرب ضمايه وأتحمل ضـمـايه
اتـيـّـه لعـيـون الغــلا وسـط حـدي=ما بيـن سـكـراته وشهـقـة رجــايه
يصرخ ضمير الحـب يابنت ردي=وانا بعـد للحــب يصـرخ قـفـايه!!
صديت لكـن ظاهري عنك صدي= أبعدت كـثـر البعـد شـفـتـك معايه
مـاهــو عـلى ودي إذا الــود ودي=ولاهو جـزاكم قــد ماهو جــزايه
يالعـن أبوه (الحـظ) فيك امتردي= مـا حـيلته تـوبـه تكـفــر خـطـايه
الذنــب ذنـبه ماخــذه بالـتــحـدي= وأنا على ما قـيـل نـــار بحشايه
اتـــوق لـجـل تـذوق يـديـك يـدي=وانعـم بقـربـك دام قربـك هـنـايه
بـسـتحـلـفــك بالله لا جــاك ردي=بــالـك!تشوف الغدر يلبس وفايه
روحي مرد الروح وانتي مردي=وابقي معايه كاني اصــلا معايه
لاتـنحـنـي للبعــد والبعــد ضـدي = ولا لا يـهـمـك ما حكـوه الوشايه
ضحيت لكن ! مابقى كان طردي= هـذا وكـان الـعـلـم عـلـم الـبــدايه
ون كـان بتصـدين!! تكفين صدي= ما ودي امشي وانتي بعدك ورايه

 أغنى الأغنياء

استمع للقصيدة

 كيف عني ابرحل ؟

لا ضـقــت مني كيــف عني ابرحل ؟
...................... لاهي بكيفي ولالي باليد حيله
يرجع صداه الصوت لا صرت اسأل
......................... واشيل حمل ٍ ما تحمله قبيله
يا ( سعود ) تكفى لا يقولون منعـل !
.................... من تـاه فيني صار فيني دليله
يعني الحنــان اللي له سنـيـن عزل
.................... والا الغرام اللي يطيح واشيله ؟
يا سعـود صـدري لا تـقـبـل.. تـقـبـل
................... ون ضاق ضقـنا خف مسمع ثقيله
المشكلة ماهي قصيد وتغزل
.................. ولاهي جروح ٍ راودتني في لـيـله
المشكلة لا صرت يا خوي تسأل
....................وين الوسيلة في انعدام الوسيله
والهـم كــايــد ون تـفـحــل تفحل
................. والحظ نــيـّــل وابن ستـيـن نـيـله
المشكلة لا ضقـت مني ابرحل
................عـنـي بـعـــيـد ٍ واتـعــدل بـ مـيـله
ما اطيق نفسي لو تحملني الكل
................ والروح حتى الروح مبطي عليله

 العنيدة

هذا وقتك يا قصيدي كـان تاليهـا قصيـد
والله ما أرضى عليها لو تحاربنـي بـلاد ....................................
يد تقدح من شرار ويد تضرب مـن حديـد
والأيادي لو تمادت والله لحصدها حصـاد ..................................
بحرق قلوب العواذل من جد ومـن جديـد
بدخل الساحة وأنا ادري أني بتركها رمـاد ................................
والبليد ابن البليد وش يقـول ووش يزيـد
يبقى في عيني حقير وأحقر بعيـن العبـاد ..................................
هذا وقتك يا قصيدي كـان تلقاهـا وحيـد
سل سيفك للمعاني حرك حـروف الجمـاد ..................................
اصلب أعداء المحبة من كبير ومـن وليـد
ون خذت روحك قصيدة موت وأبياتك شداد ..................................
والله انك ما خضعت ولا خضعت إلا شهيد
فدوة اللي لا انتخـت كلنـا نفـزع وكـاد ..................................
بالعيون وبالقلوب .. دم يسـري بالوريـد
بالحشى والله انتشى وارتكـز ثـم زاد زاد ..................................
نار تامر في غلاها تطلب القلـب المزيـد
ون عطا قلبي يتيه والمتاهـه لـي رشـاد ..................................
هذا وقتك والقوافي وين ما ترمـي تصيـد
مثل حر(ن) لو طلبته.. فز لعيـون الهـداد..................................
انطلق مثـل الريـاح وانهيـارات الجليـد
بأنكساره عنفـوان ..وكبريائـه اضطهـاد ..................................
نوّخ اللي ما تنوّخ ..كل مـا كانـت تحيـد
ما يبي غيـر العنيـدة ..وللعنيـدة العنـاد ..................................
هذا وقتك يا عضيدي كان باقيلـي عضيـد
فز كلك لا نخيتك ..تكفى واحصدهم حصاد ..................................
كان ترجع للجزالة.. انت عدة مـن عديـد
وانا لك شاعر زماني حتى لوهي بالعنـاد..................................

 غريب

يمه غريب وحضنك الأوطان
                            يمه احضنيني واجلسي جنبي
مشتاق للجمعة وحيل ولهـان
                           مشتاق لأحضانك يخليك ربي
يامن تحملتي الشدايد والأزمان
                            يامن سهرتي للمرض قربي
ياما رعيتي بدافي الأحضان    
                           ياما وطيتي الشوك في دربي
ياما جبرتي خاطر الزعـلان
                          ياما دعيتي .. راجيـه ربـي
يخليني ذخر وخيـر إنسان   
                           وعز ٍ لا انتخى للموت هبي
يمه غريب لشوفتـك شفقـان
                          مني بعيدة وأنتي فـي قلبـي
بين الضلوع وزحمة الأحزان
                         وبين المسافة والسفـر حبـي
يمه .. تعالـي اللقـا حـان  
                         القلب يخفق والعيـون تلبـي
ملت دموعي طاري الأجفان   
                        وملت جفوني دمـع ٍ تخبـي
يمـه وحيـد ينتظـر هلكـان
                        وأنتي الضما و الضما شربي
يمه غريب وحضنك الأوطان
                        يمه احضنيني واجلسي جنبي
مشتاق للجمعة وحيل ولهـان
                        مشتاق لأحضانك يخليك ربي

 عني ومني لأني

اكتب لكِ
وبين أروقة الحروف
الظروف
وبين السطور ..
قلوبٍ يهجرها السرور
اكتب لكِ
وقلمي .. ألمي
وحبري .. صبري
اكتبُ ما جهلتِ
عني ومني لأني ..
اخترت الركون إليك
والسكون لكي أكون
قريب من قلبك
ووحيد في دربك
كل هذا ..
مقابل ماذا ..؟؟
مقابل (حبك )
فاتنتي
قد لا يكون الحب
حــــ("7")ــــب
إذا رئينا
الممكن مستحيل
والسهل صعب
شاطريني
وانصفيني
قد لا ينفع الظلم
إن ظلمتيني

قاسميني الدرب
مثل ما كان الحب
يقاسمني نومي..
قاسميني ,,
السهر وليالي العمر
قاسميني
الوفاء والصفاء
وسوف أقاسمك ..
يا قمر الضياء
سأملئ قلبي بكِ
واصارع الأهوال
من أجلك
امنحيني فرصتي
لكي أكون
المغرم العاشق
الفارس الواثـق
السيف النـاطق
امنحيني ..
المرام ولذت الغرام
ولوعة الأيام ,,
واتركيني (اناااااااام)
بحضنك آو بعينك
هوينك ,, هوينك
تعالي و قوليها
كل ما فيني يرتجيها
قوليها ؟؟
قولي.. احـــبــــك

 للصبر طاقه

حسبت أن الطريق اللي بعدنـي عنـك يدنينـي

                                        وحسبت أن القلوب اللي هوت بالحـب خفاقـه
وحسبت أن الزمن يعطي ولكن كيف يعطينـي

                                      وحسبت ان الصبر يبقى وأنا ادري للصبر طاقه
تجاهلت الحياة لجلك .. ولجـل انـك تحبينـي
                                            وتعلمت السهر بـدري واعـد نجـوم براقـه
طويت أيامي الصلفة ونسيت همـوم تطرينـي
                                          وتحمل قلبي جروحه وحبك تجـرح أشواقه
تتمنيت الغـلا ساعة وساعة مـدة سنينـي
                                           وتمنيت الهوا لحظة وتـذوب بلحظـة عناقـه
تمنيت الحنـان اللـي يثـور وتذرفـه عينـي
                                             يرييح خافقـي فينـي وتنـام عيـون مشتاقـه
صبرت ولا لقيت إلا الأماني بينـك وبينـي
                                             وبقايا أحلام منثـورة تسطـر باقـي أوراقه
تعبني هاجس الذكرى وأظن انـك نسيتينـي
                                             عساها تكذب ظنونـي ونـار الظـن حراقـه
حبيبي كم بكت عيني على جرحـي تواسينـي
                                               مالوم العين يـا قلبـي وحبـك يذبـح فراقـه
يهون البعد لـو طـول مـدام انـك تحبينـي
                                          ويهون الجرح يا حبي ويهون الليـل وإرهاقه

وردتي

ماذا أرى !!

هل الورد يبكي ...
ماسبب تلك الدموع ...‍‍‍‍‍
ليته الورد يحكي...
ليتني افهم ما تقول ...
وألحق تلك الزخات بالحلول...
وردتي ماذا بكِ ...
قد بدا عليك الذبول ...
وردتي تكلمي ...
واذكري لي السبب...
هل دموعك للحياة ...
أم جرحني من محب ...
وردتي أصلك فروع ...
لا تكوني كالشموع ...
تحترق وتنتهي ...
حين تطفئها الدموع ...

// رد الوردة \\

للأسف كنت ثمينه !!
في أيادي العاشقين ...
كنت رمز للمحبة ...
وللتعابير بديله ,,
هل تلمني حينما ...
تذبل البنت الحزينة ...
من حبيبٍ خائن ِ ...
لمشاعرها النبيلة ...
هل تلمني ان رحلت ...
بعد رحيل العشق بينهما ...
هل تلمني آن ذبلت ..
بعدما كنت جميلة ...

 كفا للحب

 كفا   للحُب   يا   حُب  كفا
                             تعبت  منك  ومني   اكتفيت
أقصيتني    عام   تلو   عام
                             وسلبتني أضعاف ما أعطيت
كفا   يا   آفة   الدنيا   كفاك
                             كم   من    قلوبٍ     سبيت
عشقنا    جهلا   ما   وأراك
                             وكنا   اضعف   من   لقيت
حسبنا   جنة    الحب  الهوا
                             وهوا    فينا    الهوا    ليت
ليتني    ما   خاطرت  بقلبي
                             ليتني  يا ذا   الجمال   اتقيت
ليتني   أعمى    ولم    آري
                             ما لم    أرى    حين  رئيت

 كلي أحضان

لا أنا ما قلت احبك..
ومن يقول إني احبك
أنا لا أهوى !!
ولا اعشق ... سواك,,
وش تكون الدنيا دونك
حتى عمري وش يكون
بي يكون الموت أولا
لو قسى قلبي ونساك ,,
دام أرجعك الوفى .
والزمن فينا اكتفى
اسكني قلبي سعادة
وللفرح وابكي معاك ,,
كلي أحضان انتظر
رجعتك بعد الغياب
مل قلبي من الصبر
وكل ما يملك رجاك,,
كلي أحضان احضنيني
وذوبي باقي حنيني
غالية والعمر يرخص
للغوالي يا ملاك ,,
حبي ضميني شموع
تحترق لجلك دموع .
كفكفي باقي دموعي
ردي في روحي هواك,,
وواعـدي قلبي بوجودك
واحفظي لي وعودك
واثبتي قلبك وحبك
واشتري قلبٍ شراك,,
ما يبيعك لو تبيعين
وأنتي في حبه سنين..
قلبي لو يجفى حبيبي
يا جفى الدنيا جفاك ,,

 بدري عليك

بدري عليك
تبكيك عيني
من ما يبينا ما نبيه
وش عاد أغليك ,,
بدري عليك
انك تذليني..
ما عدت أنا احبك
ولا عدت أبيك ,,
انتهى فيني هواك
وانتهيتي من حياتي
انتهى قلبي ,, وغرامه
والنهاية تبتديك ,,
ما عاد قلبي لك حبيب
ما نسى لكن قسى
والجوى راعي النصيب
ومثل ما تعطي يجيك ,,
روحي يا من ...
كنتي روحي
واخذي الماضي معاك
ما ابي شي يطريك ,,
لا الرسايل ..
لا ولا ذاك الكلام
ارحلي من قلبي يمكن
لو رحلتي احتريك ,,
وان رحلتي ارجعي لي
قلب صادق..
اشتريني بالمحبه
وبالمحبه اشتريك ,,
وان رحلتي قاصده
ذل قلبي بالمحبه
ارحلي من غير رجعه
والا أنا بدري عليك ,,

 المشكلة

كل المواقف تهون لأبسط خيار
                        المشكلة لا صار صعب اختياري
عقلي يقول اتخذ فيه القرار
                            وقلبي يقول لا تهور حذاري
اسهر وبالي يحتوي كل الأفكار
                        اسهر وصدري تشتعل فيه ناري
لا طاريٍ يطري ولا شي صار
                        في حيرتي أبقى أسير انتظاري
لاجاني مرسوله ولا جتني أخبار
                    وش حيلتي ماني على البعد ضاري
انتهى فيني الأمل والانتظار
                        كم كسيت الحب والحب عاري
ما يفيد مجابه الثار بالثار
                        لا صار قلبي ما تحمل قراري
أبي ابتعد ما تطفي النار نار
                        الله حسيبه كل ما حل طاري

 شرفتي الشهادة

أي طموح .. و أي شموخ .. وأي إراده
                                    تملكين الدنـيـا في عزم و أمـل
حتى في صبـرك تملكتي الرياده
                                   والله فــي عدله مــا ينسى عمل
كم وطيتي الجرح والجرح يتمادا
                                       كم سعيتي ولا عرف دربك ملل
كنتي قدوة للي في قلبه هواده
                                     وصرتي رايه للي في عمره همل
لا خضعتي لجرح ولا طعتي عناده
                                      ولا عرفك اليأس في زود الحمل
وما ألومك يوم شرفتي الشهادة
                                        لك طرى حزنك ودمعك انهمل
والحضــور اللى تقطع به فؤاده
                                        واللي من دمعه شرب لينه ثمل
الله في عونك وهـو كـافل عباده
                                         اطلبي الرحمة وزيدي بالعمل
الله يبلا .. والله له شانه ومراده
                                    والله يجزي من على البلوة صمل

 أرق
 

ارق ..
وشيء من عيني أنسرق ..!
وشيء في فكري مرق ؟؟
هموم ..
تجمع البرد بسموم
وتسهر معها النجوم,,
تجتمع فيني وفيني تفترق
اتجاهلها ثواني ..
تكثر بوقتي وزماني
وان اخذ وقتي عليها
من يديها يحترق ,,
من دخل بحر الهموم..
لا يفكر به يعوم
اسألوا من جرب الهم..
اسألوا منهو غرق؟
كم يقول.. العقل زينه
والعقل مثل السفينة
والهموم اقسي بحر
والسفينة من ورق ,,

طفل يحلم..
يبي الدنيا على كيفه
يبي يكبر..!!
يبي يلعب مع طيفه؟
خياله كم بنى أحلام..
في حلال أو حرام
كم يشوف الدنيا حلوة..
واتحد برده وصيفه
كل أيامه ربيع..
يشتري فيها ويبيع
تخدعه فيه البراءة ..
ما درى الدنيا مخيفه
كيف حاله لوعرف ..
بعد لعبه والترف
ينتهي سن الطفولة ..
ويبتدي عمر الخليفة
طفل يحلم ..
يبي الدنيا على كيفه ..
ورحى الأيام
ما ترحم مجاديفه..
 

شعر / سعد مسهوج العلاطي

saad_poetry@hotmail.com

السعودية

الصفحة الشخصية http://www.alnadawi.com/poems/members.php?action=profile&id=568

جميع الحقوق الأدبية محفوظة للكاتب وحقوق النشر والتصميم لموقع العنان